Huis Herfsblaar - onder voogdyskap van die NG Gemeente Queenswood is gelee in die rustige en boomryke woongebied van Queenswood, Pretoria - binne bereik van verskeie winkelsentrums, hospitale en die Oor Instituut gehoorsentrum.
Vanaf 1983
Ontstaan
In Queenswood Pretoria, is ‘n visie van 38jaar gelede bewaarheid met die oprigting van Huis Herfsblaar Aftree-Oord. ‘n Oord wat ‘n tuiste vir bejaardes sou word waar uitnemende, omvattende en bekostigbare verblyf gelewer word.
Personeel is aangestel om verblyf te
verskaf asook om ‘n omvattende wye reeks dienste aan ouer persone te voorsien
wat betref hul fisiese en psigiese behoeftes.
Huis Herfsblaar streef na gehalte
sorg deur middel van algehele versorging wat ook ‘n Alzheimer-afdeling insluit.
Ons personeel, asook inwoners sorg
vir ‘n warm huislike atmosfeer, bou verhoudings en word pastoraal versorg.
Opbouende programme en aktiwiteite
word aangebied en die inwoners het toegang tot ‘n groot en pragtige tuin. Christelike beginsels
word gehandhaaf en daar word voortdurend op die behoeftes van die inwoners
gefokus.
Die personeel word deurentyd gemotiveer
om gehalte diens te lewer, terwyl ons poog om altyd eerlik, deursigtig en eties
op te tree.
Die Aktiewe Plus Lewe-benadering word wêreldwyd as die beste leefwyse vir ouerwordende persone voorgehou. Een van die belangrikste rolle van die Dienssentrum is dus om elke inwoner se lewe so volledig as moontlik te maak, daarom is die aktiwiteite en funksies wat deur die Dienssentrum aangebied word van kardinale belang.
Hierdie aktiwiteite moet inpas by 'n groot groep uiteenlopende inwoners se voorkeure en behoeftes, maar moet terselfdertyd siel, gees, verstand en liggaam stimuleer.
Dienste en aktiwiteite wat gelewer/bestuur word is:
Daaglikse etes
Vervoer
Gesellige byeenkomste met verskeidenheid sprekers en kunstenaars
Woel-en-Werskaf (handwerk)
Blommekomitee
Klassieke Musiek
Bybelstudie
Lekkerliedjies/Lofsang
Koor
Biblioteek
Brug, Kanasta, Rummicub, Snoeker, Skaak en Veerpyltjies
Trimgim
Inkleurterapie en kunsgroep
Saamstap
Ekstra funksies op Vrydae
Die klemverskuiwing met die Vrydae-aktiwiteite het die bedoeling om die ouer persoon te ontwikkel, en om sy emosionele-en geestelike welstand te bevorder met die skep van 'n instaatstellende en skeppende omgewing. Verskeie aktiwiteite is met hierdie doel voor oë na die NG Kerksaal en veral die tuin verskuif sodat meer inwoners asook personeel betrek kan word. Elke funksie is met groot entoesiasme en baie dankbaarheid deur die inwoners begroet. Uit hierdie Vrydag-aktiwiteite soos bv. lente/loslitdag, internasionale dag vir bejaardes, oggendtee vir al die 80 jariges, kersfunksie,vrugtefees, en pannekoek kafee spruit volgende voordele:
- Belange en behoeftes van die inwoners word aangespreek,
- Vind betekenis in die oudag
- Vind en behou sin in die lewe
- Besef dat jy nooit te oud is om te leer nie
- Gebruik jou lewenswyshede as bate
- Verhoudings word versterk
- Leer om te gee en te ontvang
personeel
Getuigskrif
Baie dankie vir die professionele en persoonlike manier hoe julle ons ma, Mev Bessie Dreyer (Kamer D302) versorg het oor die afgelope agt jaar. Alhoewel sy dit moontlik dalk nie altyd besef het nie, weet ons familie dat sy altyd in goeie hande was. Ons het julle leer ken, nie net as 'n versorgingsspan nie, maar ook as persoonlike kontakte.
Namens Bessie Dreyer, baie dankie vir julle uitstekende diens oor hierdie tydperk. Ons sal altyd goeie herinneringe hê aan Huis Herfsblaar.
Vriendelike groete
Dit is met leedwese dat ons verneem het van die heengaan van ons geliefde vader, Chris van Schalkwyk, gister. Graag wil ons kinders vir almal betrokke baie dankie sê vir die ongelooflike omgee wat hy tot op die einde ervaar het. Dit kon nie altyd maklik gewees het nie - hy kon ook maar 'n hardekop gewees het - maar hy het dit altyd goed bedoel.
Nogmaals dankie vir die tyd wat hy by die "Blaar" kon spandeer - dit is 'n spesiale plek, vol spesiale mense.
Groete
Mnr. James Black en personeel.
Graag wil ons, kinders van Petro Gelderblom baie dankie sê vir jul liefde en versorging aan haar die afgelope 6 jaar. 2 Jaar in die groot gebou en 4 jaar in die kliniek. Ons kon kom en gaan soo ons wou. Lekker in die lapa haar verjaarsdag en familie byeenkomstes gehou.
Die personeel was altyd vriendelik en beskikbaar wanneer nodig. Herfsblaar het vir ons soos 'n tweede familie geword en gaan dit baie mis.
Groetnis
Ons as inwoners van Huis Herfsblaar wat gereeld van Herfsblaar se vervoer gebruik maak wil dankie sê vir Mnr. Neels de Waal, dat jy ons gereeld veilig vervoer.
Vir jou bedagsaamheid, jou vriendelikheid en dat jy altyd hulpvaardig is.
Hiermee ʼn baie spesiale woord van dank van al die kinders, kleinkinders en familie aan huis Herfsblaar, vir dié voorreg wat ouma Susan van Niekerk gehad het om daar, die laaste 31 jaar van haar lewe te kon deurbring.
Vir haar om daar te kon woon, het baie meer beteken as wat woorde kan sệ. Sy was deurgaans gerespekteer met dié wonderlikste liefde, aandag en versorging wat niemand anders haar ooit sou bied nie.
Vergun ons ook, om dan ʼn baie spesiale woord van dank te betuig aan vloer A1 en hulle baie spesiale personeel, wat geen steen onaangeroer gelaat het om haar as oudste inwoner soos hulle eie moeder te behandel nie. Die liefde wat sy daagliks by hulle ontvang het, kan geen geld koop nie. Ek weet ek wil nie graag iemand daar uitsonder nie, want almal was baie spesiaal en professioneel maar ek sal my eie gewete skade doen as ek nie spesiale melding maak van suster Luella nie. Sy het vele kere tydens dié epidemie inperkings, uit haar pad uit gegaan om te reël dat ons haar tog gereeld kon besoek of net met haar op skype praat en dit oor haar persoonlike foon as sy op diens was.
Aan dominee Jan, baie dankie vir jou vaderskap, konstante besoeke, mooi woorde en ja ook vir dié voorreg dat jy haar uiteindelik tot by die poorte van die hemel kon vergesel .
Ons innige dank aan almal wat haar op haar laaste pad na vrede vergesel het.
Soekie en Willie Olivier.